श्री संतिकरं स्त्रोत

।। श्री संतिकरं स्त्रोत ।।

संति-करं संति-जिणं, जग-सरणं जय सिरीइ दायारं ।
समरामि भत्त-पालग-निव्वाणी-गरुड-कय-सेवं                       ||1||

ॐ स नमो विप्पोसहि-पत्ताणं संति-सामि-पायाणं,
झ्रौं स्वाहा-मंतेणं, सव्वासिव-दुरिअ-हरणाणं                           ||2||

ॐ संति-नमुक्कारो, खेलोसहिमाइ-लद्धि-पत्ताणं ।
सौं ह्रीं नमो सव्वोसहि-पत्ताणं च देइ सिरिं                             ||3||

वाणी-तिहुअण-सामिणि-सिरिदेवी- जक्खराय-गणिपिडगा ।
गह-दिसि-पाल- सुरिंदा, सया वि रक्खन्तु जिण-भत्ते                ||4||

रक्खन्तु मम रोहिणी, पन्नत्ती वज्जसिंखला य सया,
वज्जंकुसि चक्केसरि, नरदत्ता काली महाकाली                       ||5||

गोरी तह गंधारी, महजाला माणवी अ वईरुट्टा ।
अच्छुत्ता माणसिआ, महामाणसिया उ देवीओ                         ||6||

जक्खा गोमुह महजक्ख, तिमुह जक्खेस तुम्बरू कुसुमो ।
मायंग-विजय-अजिया, बम्भो मणुओ सुरकुमारो                       ||7||

छम्मुह पयाल किन्नर, गरुडो गंधव्व तह य जक्खिन्दो ।
कुबर वरुणो भिउडी, गोमेहो पास-मायंगा                                ||8||

देवीओ चक्केसरि, अजिआ दुरिआरि काली महाकाली |
अच्चुआ संता जाला, सुतारया~सोय-सिरिवच्छा                        ||9||

चंडा विजयंकुसि, पन्नइत्ति निव्वाणि अच्चुआ धरणी ।
वइरुट्ट छुत्त गंधारी, अम्ब पउमावई सिद्धा                              ||10||

इअ तित्थ-रक्खण-रया, अन्ने वि सुरासुरी य चउहा वि ।
वंतर जोइणि पमुहा, कुणन्तु रक्खं सया अम्हं                          ||11||

एवं सुदिट्ठि-सुरगण-सहिओ संघस्स संति-जिण-चन्दो ।
मज्झ वि करेउ रक्खं, मुणिसुंदरसूरि-थुअ-महिमा                      ||12||

इअ संति-नाह-सम्मद्दिट्टी- रक्खं सरइ तिकालं जो ।
सव्वोवद्दव-रहिओ, स लहई सुहसंपयं परमं                              ||13||

तवगच्छ गयण-दिणयर-जुगवर-सिरि-सोमसुन्दर-गरुणम ।
सुपसाय-लद्ध-गणहर-वीज़्जा-सिद्धि भणइ सीसों ||14||